Bevraaidenskonsert Grootkoor in Metinikerk op 7 mai viefentwinneg (column)

Tou mor, docht ik, een kollum kobinaaiern mit wat negoatzie, mout maggen. Grunnings Grootkoor geft op zeuven mai 25 een bevraaidenskonsert in Metinikerk¹. Soalisten bint: Martin Mans op Schnitger, Rob van Dijk op pioano en Melissa Venema op trompet. Der bint drij repetietsies. Koarzangers worden versierd mit rood-wit-blauw, veur vraauwlu sjoaltjes, en veur manlu strikjes. Meziek krieg ik week veur eerste repetietsie. Ik heur dirigent al: aanpeerdjen Kloas, drutjen dust toes mor in bèrre.

Kommergerdienen binnen nog toe. t Is nog gain acht en koorstudie begunt. Onder tied dat ik ien Adidasboksem mien dagelkse houpeloefens ofwaark, oldere manlu doun ja wat om heupen en bekken smui te holden, galmen  de vibrerende tenoarpertijen, inzongen deur Nan van Groeningen, deur kommer. Vraauw dij ik aaid vraauw ain nuim, dut, begripvoller as begripvol, gelukkeg extra laang over schimmel oet douzbak wegbounen en schrobben en  stiften van lippen. Ik perbaaier de melodie te volgen en dou asof intonoatsie en moduloatsie mie op het lief schreven binnen.  

Sunder hail veul muite stapt mien republikijnse ik over teksten hin as ‘God save the King’ en de hardcore atheïst in mie verblikt of verbloost nauwelks (een vrundelke omschrieven van tamtoatsie²) bie ‘Nearer my God to thee’. Prinzipes en beklokkerde³ poletiek korrecte gedachtens worden sikkom smui as stugge kunststovven fietstazzen dij noa joaren in boeten achterop n oldmoodse Gazelle in n waarme berging zet worden.

De WhatsAppgroep mit Rogier, Erna en Lycke dut asof Signal nait bestoat en wordt nij leven in bloazen. Schier hou vraauwlu tot tenor transfermeren. Wie kieken oet noar honderd-plus stemmen dij noa twij uren stoer waarken soamen vlouien as beton woar de flintkorrels oet zeefd bint. Ik vernuver mie bie gedachtens aan dij ferwailen⁴ luchtege tonen van trompettist Melissa Venema en op t kwajongsspel van Martin Mans dij stinnende Schnitger mit koegelsgeweld joechaaien⁵ loat deur t mesien te kieteln, bepotelen en mazzeren as n taargde kermisganger zien krek veroverde poedie op Roakeldais.

Repeteren in kerk in Haren, mit dirigent Etty van der Mei stait geliek aan zatte vervoeren in drijsterreneethoes.

¹ k krieg € 5,- kötting op  haandvol koarten dij gewoonlek € 20,- doun. Wel eerst komt moalt ja ook eerst. ² tamtoatsie – kwelling ³ beklokkerde – gekoesterde,⁴ ferwailen – fluwelen; ⁵joechaaien – juichen